“САСПЫТ СААҺЫМ” Трушкова Галина Александровна-Калисфена

Күн сирин көрбүппүнэн

Күөх окко түспүппүнэн

Бараахап дойдутугар

Дьаарбайбыт хонуутугар

Харбалаахха үүммүтүм

Көрүлүү көччүйбүтүм.

Кэнэли күөл сыырыгар

Кэккэ сүүрэр ыллыгар

Лыахтыын тэҥҥэ сырсыһан

Дьиэрэҥкэйдии кылыйсан

Оонньуу түһээт бэрт начаас

Элэс гыммыт оҕо саас.

Биитэр ааспат ахтылҕан,

Тыалы кытта кыттыһан,

Билигин да күннүктээн

Үөрэ-көтө мэниктээн

Оройунан көрөр дуу,

Чачыгырыы күлэр дуу?

Омокуун сыһыытыгар

Сибэккитин быыһыгар

Быыкаа сааһым дуораана

Саһан хаалта буолаарай…

Хас саас аайы тыллаары

Өссө күүскэ ыллаары.